東京淺華和服攝影服務初體驗

原來影和服詢問度都幾高woo 🤣 講真，3年前，社交平台上去日本影和服嘅相，可以話多到爛，睇到厭，自己都影到唔想影。 今次就當然唔同啦！ 咁多年冇去旅行，個女都大埋，點可以唔影嚟紀念下！ 租和服👘影相，其實源於雷小囡嘅執念！ 因為上次一家人一齊去日本，出發前訂晒和服👘 當時佢仲細，到和服店果刻唔知突然咩事情緒到，點氹都唔肯著，所以最終全家人著晒和服影果張相，得佢一個著便服。 到而家大左，就越睇越後悔，所以佢好執着一定要去日本影返張和服照，貼返上牆🤣🤣 原本我好想喺河口湖影和服嘅，因為河口湖好多景，都係日本獨有、而唔同啲乜寺乜廟，日本邊度影都差唔多。 睇睇下，搵到一間啲相我勁鐘意，細看下， 原來仲有攝影師服務，又原來我從未諗過旅行搵攝影師架😍😍😍 諗諗下，真係好吸引，我搵左好多間比較，睇左好多攝影師。 最後揀左一位 #在日港人攝影師 ， 佢啲相真係超級靚！ 不過可惜…. 我三年冇得去旅行，相對佢嚟講，同樣地3年冇返過香港見家人。 最終啲期撞到啪啪聲… 我左計右計改行程都就唔到🥲最後唯有放棄啦！ 當留返一個遺憾，下次去東京一定要搵佢影相📸️ （想睇可以留言話我知，pm you ) 冇左果位攝影師，我又覺得冇必要左趕右趕， 最終就改到最後返東京影。 當然，東京和服攝影，最方便最大路就係淺草雷門啦， 喺冇乜時間嘅選擇下，唯有咁啦！ 而淺草影和服有埋攝影師服務，選擇都唔多。 本來想book一家聊天過程中比較親切嘅和服+攝影師。 （聊天用繁體字） 不過時間夾唔到，因為當日我哋喺箱根去東京， 時間比較難預 ，佢地得返11:00 時段， 我地點計都提早唔到、所以唯有下次啦！ (啲相都係比較溫馨自然嘅風格，我都鐘意嘅） 最後搵左呢一間，和服+攝影師， 佢地嘅價錢係比較便嘅、因為同價錢， 另一間係45分鐘攝影，呢間有一小時。 15分鐘嚟講，好似都幾大分別，因為行去都要時間㗎嘛。 最終我地仲揀左佢地貴少少嘅套餐，加夠1.5小時攝影。 而且因為我地自駕，都好擔心時間我地有啲難預計。我問左店家，遲左到有冇影響？ 佢地就回答冇問題，呢點係我選擇佢最大嘅原因。 咁… 不過，呢樣就係有利有弊啦！ （詳細下面再講） 當日我地出發去東京開始，我就不斷PM佢地， 因為佢地店嘅電話喺車嘅GPS完全搵唔到， 而且市中心亦要自己搵位泊車。 我不斷問佢邊度泊車近同有位，客服只回答公司附近好多。 但我上Google一睇，係，好多，全部得2個車位😅😅 最後我地都兜左好耐先搵到車位再行去。 店面確實唔差，套餐包嘅和服都算多。 不過可能生意太好，同埋真係市中心遊客區。 同我以往租和服嘅經驗相比下… 以前去嘅真係正統和服出租，換衫講緊數唔到咁多層，就毛巾都左攝右攝，包到隻粽咁。 平時啲店員會好溫柔地問你要咩配帶配飾。 而呢間相對下就比較hea… （一分錢一分貨啦） 當日換衫姨姨都幾趕，問都冇問就是但配條帶俾我， 腰帶殘舊，條繩甩左石，佢話影相影唔到，ok … 而且內襯係得一件，到最後連衫䄂都係用橡筋紮住冇除過🤣🤣🤣 （橡筋，黃色果啲呢） 攝影當日超凍，我地預少左保暖衣物… 因為印象中嘅和服幾十層變左得一層… 我見佢內襯來一層就完… 即時想幫阿女加返件底衫，（果時係未著晒架！） 姨姨話著左喇，唔加得喇… （呢下真係有啲唔開心）唯有自己再狂加暖包啦… 呢間嘅好處係攝影師隨傳隨到， 我估佢地好多攝影師。但壞處就係人多未必有品質保證， 因為邊個得閒就邊個跟，好彩係，一個影影下，遇到另一位攝影師（較資深）話自己影完得閒，見我地人多嚟幫手影。 咁都叫做有啲相正正常常。 攝影師態度唔錯，仲好好嘅， 本來仲好感動，突然多左一個攝影師跟，好開心。不過收相呢刻，有啲O嘴。 我收到相終於明點解要多一位攝影師跟🤣🤣 估計係資深攝影師幫其他人影緊，搵左位新手攝影師跟我地，佢影完即時嚟幫手咁.. 當然啦，我地都唔啱嘅，因為我地果日搵唔到佢地間舖，再搵泊車嘥左超多時間，係遲左到嘅，所以呢點都唔怪得人。 我同老公影左幾張雙人照，收相前好期待， 收相果時有失望嘅， 而2個女有個景玩得好開心，本身又係好期待， 不過最終冇出現過（我估炒晒） 好彩我自己影左幾張。所以有攝影師自己都要影啲，安心啲。 總括嚟講，叫做一家四口影到全家福相， 都好開心嘅，唔好咁高要求啦😂😂 呢間啲相風格係穩穩陣陣咁啦，絕對夠相嘅。 但就唔好講咩感覺唔感覺喇🤣🤣 （即係好空泛，類似係間餐廳食得飽但唔好要氣氛） 如果要求唔高，其實平平地，都ok 嘅 不過老公就叫我下次一係唔好影，一影就搵啲好啲嘅， 因為機票酒店時間除返咁貴， 影得唔靚就連機票錢都嘥埋🤣🤣🤣 （小小微言咁啦） #東京之旅 #東京親子遊 #疫情後再出發 #東京雷門 #和服攝影 #淺草 #東京景點 #東京自遊行 #東京之旅 #報名酒店試睡員