🛄Staycation🛄 銀鑛灣渡假酒店🏞️

#familytravel #beaches #炎夏好去處 #抵玩酒店 前排聖誕假期帶咗兩隻鴕鳥仔去咗梅窩玩，住咗一晚銀礦灣。個package本身喺專業旅運book嘅，雙11優惠，折咗一千二百幾包三個人早午晚三餐。 💠特色 ✅梅窩唯一四正酒店 ✅多親子同康樂設施 💠酒店及房間裝潢 話就話係酒店，但係設備同裝修充其量只算係高級版嘅宿營，不過喺梅窩都冇得揀㗎喇，好過住旅館同渡假屋。起碼都叫乾淨企理、設備齊全。不過留意房間冇樽裝水提供，要自備水樽喺樓層嘅飲水機斟水。 💠酒店設施 除咗有健身室同泳池，仲有各類運動場同康樂設施，包括獨木舟、射箭、單車等等，價錢唔算貴，不過留意要預備現金去交按金。我哋package本身包咗單車或者射箭二揀一，我哋揀咗踩家庭車，兩個大人踩，中間一個小朋友坐順風車。我同大女踩，踩到hihi😂，因為架車都幾笨重，遇到窄路要落地手動推車轉彎同掉頭。 酒店得一間餐廳，三餐都係喺度食，但係人手不足，等餐同等位時間都比較長。可能酒店都知唔夠人手，所以添置咗幾部送餐機械人，又識唱歌又識送餐又識叫人嘟安心出行，好鬼盞鬼🤣。晚餐可以揀半自助餐或者BBQ，好彩我哋揀咗半自助餐，嗰晚咁啱落大雨😜。食物質素除咗晚餐有啲睇頭之外，早餐同午餐都係茶記質素，不過不失啦。 💠親子措施 好多嘢啱小朋友玩，除咗前述嘅大人細路都啱玩嘅康樂設施之外，仲有兒童遊戲室、花園嘅遊樂設施、街機、尋寶遊戲等等。遊戲室裏面租氣墊球都幾貴，其他就都免費嘅。都幾多人輪候打機，我哋就去咗玩尋寶，其實係類似野外定向，問前台攞張遊戲紙就可以去搵checkpoint打卡。原本以為會好流，點知原來好有難度，好多checkpoint啲位收得好鬼鼠，有啲燈籠又畀風吹到甩曬，要好仔細先搵到。淨係玩呢個都玩咗個幾兩個鐘，不過玩完可以問前台攞小禮物，小朋友好開心、好有成功感👍🏻。 💠總括評語 呢間酒店其實都好適合帶小朋友嚟玩嘅，事實上都好多家庭嚟住。嚟得梅窩玩都係想呼吸下郊外嘅新鮮空氣，同埋欣賞下海島風光，帶住小朋友，住一晚就唔使玩得咁趕。雖然佢裝修略嫌清簡咗啲，但勝在多玩樂設施搭救，留意下啲優惠package，一千頭包曬三餐，都算抵玩。酒店玩唔夠嘅，仲可以附近租單車踩下或者行下山。租單車嘅，碼頭附近同酒店隔離都有得租，廿蚊一個鐘，碼頭嗰間一個鐘起租，酒店隔離就兩個鐘起租，豐儉由人，沿住海岸線踩，盡收無敵海景👍🏻👍🏻。 銀鑛灣渡假酒店官網傳送門：https://www.silvermineresort.com/tc 地址： 香港大嶼山梅窩銀礦灣 D.D.2 地段648 #鴕鳥媽自肥日記 #親子出遊 #staycation #銀鑛灣渡假酒店 #梅窩 #銀鑛灣 #親子酒店 #踩單車 #海景酒店