LLaiDudu未落車大門外已經見有駝鹿公仔,酒店入面周圍都會見到唔同既駝鹿擺設,好有趣。職員好有效率check-in非常快(留意返500銖按金要俾現金)。
房間好乾淨冇怪味,有一大一細兩隻窗,日頭開窗簾就夠晒光猛,係夜晚就會覺得燈光唔係好夠。分體式冷氣比駝鹿公仔更搶眼,雖然對正床但有遙控可以調校送風角度同溫度,冇中央冷氣一係好大一係冇風嘅問題,唔會吹住唔舒服。
床單冇污漬,好滑冇毛粒,讚!枕頭一軟一較硬,呢幾晚都訓得好舒服。
電視有超級多台花多眼亂,都係開返youtube睇好過。
廁所好大,不過可惜冇做到企缸加浴缸。水力夠唔會忽大忽細忽冷忽熱,但就唔夠熱。亦都體驗到其他留言話浴缸邊有積水嘅問題。
房務員執房都好快好整齊,專業!
餐廳有室內室外座位,亦有窗邊吧檯位。食物選擇唔算多,不過質素幾好,可惜佢哋已經冇咗咖哩麵,但佢個咖哩豬腩都好好食。
健身室就叫做好過冇,好細。
酒店過對面馬路就係7-11、Starbucks R、Let’s Relax。寧曼1號就係前少少,再前行5分鐘就到大商場Maya非常就腳。
值得一提酒店外轉角位有間西餐廳,老闆超nice好熱情招待,推!
美中不足就係出面十字路口長期塞車,call grab要俾少少耐性,或者揀啲橫街上落車避開大馬路。
大堂有零食提供,亦有甜品同泰式小食(人地有寫只供堂食係俾你坐低慢慢食,唔係拎上房或拎走。可惜眼見有啲人當自助餐咁執晒一大碟拎上房,自律啦香港人)
顯示更多