《大圍小館》大紅燈籠高高掛
大圍小館一直以來口啤唔錯，更入選米芝蓮指南2022，絕對係必食之一。晚市只有18:00或20:00兩輪，唔預約基本上好難有機會食到。
1️⃣ 勾魂叉燒（$188）
店員先為叉燒掃上陳皮勾魂燒汁，再用火槍將叉燒外層燒至微燶焦脆，之後連同奪命脆米一齊食；燒過嘅醬汁完全滲入叉燒當中，香氣更濃，另每件叉燒都好大件，肉質又腍又嫩，成功將食客勾魂。
2️⃣ 蜑家鴛鴦魷（$208）
呢款係水上人家名菜，鴛鴦魷即係土魷及鮮魷，前者爽而不韌，後者味清但鮮嫩，兩款魷魚均味香，互相輝映而且鑊氣十足。
3️⃣ 原曬豆豉雞煲（$208）
雞煲選用大孖原曬豆豉，爆香左嘅豆豉非常香，而且唔會好油；雞件係新鮮雞，雞味濃郁，肉質彈牙細嫩，豆豉味亦唔會蓋過鮮雞味，食材講究又高質。
4️⃣ 金沙鮮魷（$158）
看似平凡，但食得出廚師嘅用心，有別於平時食開嘅椒鹽／黃金鮮魷。外層咬落超鬆脆，肉質超嫩彈牙，名乎其實外脆內嫩，一啲都唔韌；鹹蛋黃亦好均勻，唔會一啖濃一啖淡，推薦。
5️⃣ 薑汁芥蘭（$128）
簡單嘅芥蘭亦見用心烹調，芥蘭已削去外皮，既鮮嫩又清甜爽脆，完全無草青味，另薑汁味亦突出，但唔會過濃或過辣。
6️⃣ 砂煲蝦頭膏炒飯（$188）
若果用名車去比喻炒飯， 呢款炒飯一定係勞斯萊斯，實而不華且注重細節，非常有內涵，炒飯粒粒分明，蝦頭膏香氣十足，蝦肉爽口彈牙，與葱粒一齊拌勻，油而不腻，濃郁又帶點清新，好食到停唔到口。
最後，餐廳送上椰汁西米露及椰汁馬豆糕，兩款甜品都椰香十足，呢一餐確實相當滿足。
大圍小館
📍大圍積福街92號
#foodie #夏日搵食推介 #hkfoodie #hkfood #香港美食