深圳一日遊--南山區

#深圳行程 今次介紹我最鍾意嗰區--南山區😌因為佢比較新，人比較少，成個感覺比較舒服。不過今次去嘅地方冇咁集中，中間要轉地鐵或者轉的士。 過咗關之後，直接的士去深圳灣萬象城，嗰度應該係目前為止深圳數一數二高級嘅商場，貴嘅餐廳當然有，不過今次去食嘅茶室價錢好親民，以粵菜為主加入西式嘅元素，好味得來又有創意。 之後就可以去行吓海岸城，海岸城好大，入邊有戲院、溜冰場、遊樂場。。。仲有好多餐廳同埋適合大部份人嘅牌子，所以我都幾鍾意行。 之後去咗一間騰訊職員都會去嘅企鵝診所，因為係預約制，所以人相對少啲，而且裝修靚，感覺比較高級☺️佢基本上所有科都可以睇，最出名應該係牙科同埋兒科，小朋友配眼鏡都喺嗰度配。 夜晚就去咗一間香港人一定會鍾意嘅海鮮火鍋餐廳，佢嘅花膠雞煲真係勁足料，而且所有海鮮都係新鮮嘅，大部份烚15秒就食得，價錢亦都非常親民。 因為帶小朋友，所以夜晚帶佢去咗體驗一個全感式嘅VR，呢個香港一定冇，非常特別，除咗視覺，仲有觸覺同各類感覺，小朋友勁鍾意，好好玩。 一日嘅行程真係非常之充實，下次帶小朋友建議都係住返晚酒店，大家都冇咁攰。 🗓️行程安排: 深圳灣萬象城 -- 海岸城 -- 企鵝診所 -- 鮑火活海鮮餐廳 -- 歡樂海岸