超級放題 回本攻略

呢個真係唔推介唔得，三百幾蚊嘅放題包埋日本海膽同魚子醬，真係邊度都搵唔到。 餐廳怕你就咁食海膽會覺得寡左d，就有心思地提供左幾款嘅食物款式： 海膽軍艦：最純粹嘅海膽選擇，細細粒讓你可以慢慢品嘗海膽嘅鮮味。 海膽拖羅黑松露帶子：細細件，一啖一件，啪入口就一次過食到海膽、拖羅、帶子不同層次嘅鮮甜，再加埋香郁嘅黑松露，好食到再叫多左一次。 海膽拖羅雪魚乾手卷：此終覺得海膽配紫菜係絕佳嘅配搭，如果你同我口味一樣，呢個一定要叫。而且加埋拖羅一齊食，果陣海水嘅鹹鮮味令我重複叫左呢個手卷3次。 除左海膽，魚子醬都係任食，配上喺自助區自取嘅小多士一齊食，果種奢華嘅感覺令我有一刻忘記左自己係食緊放題，以為係喺西餐廳食緊晚餐。😅 點只日式放題咁簡單，仲有港式食物，款款吸引，任叫任食，挑戰你嘅味蕾與胃容量。 鮑汁鮑魚撈一口花菇飯：食自助餐/放題嘅大忌就係食飯，但呢個唔叫一定後悔。鮑魚又腍又多汁，飯粒充滿鮑魚汁嘅鮮味，必食! 金湯燴花膠翅 ：大大件花膠，入口滑溜有口感，鍾意食花膠嘅，真係要叫夠3個round。 避風塘炒蟹：靈魂一定係個脆蒜辣椒粒，勁惹味，忍唔住用嚟點埋雞軟骨同串燒牛舌一齊食。 日式放題唔少得嘅刺身，重點揀左三文魚、北寄貝、赤貝、帶子。三文魚勁厚身，夠晒肥美；北寄貝望落好靚，大大件，有口感；帶子鮮甜又爽彈。 炸物就一定要食炸年糕、榴槤炸彈。鍾意食榴槤嘅就記得喺自助區攞返幾件烤榴槤，烤過嘅榴槤入口更軟綿綿，味道更甜。 仲有件鵝肝多士，第一次食到鵝肝大過件多士，香濃嘅鵝油香味，唔怕膩嘅真係可以食多兩件。 港式食物仲有花膠海蔘瑤柱翅羹，足料又好食。仲有大推飲品 - 樽仔港式奶茶，唔會太甜，又有茶香，仲好順滑添。 總之呢度嘅食物真係大部份都幾正，加上餐廳係酒店餐廳改裝而成，坐位舒適，環境光潔。都係果句三百幾蚊，食到海膽、魚子醬、鮑魚、避風塘炒蟹等，真係食多少少已經回晒本。而且味道唔差，刺身亦算新鮮。殿•大喜屋絕對係我個人覺得抵食、好食之選。 📍地址：旺角太子道西193號帝京酒店二樓 #香港美食 #高質放題 #日式放題 #日本海膽 #魚子醬任食 #任飲任食 #旺角美食 #回本之選 #避風塘炒蟹 #鮑魚撈飯 #港式奶茶 #自助餐