🏞️昂坪大澳親子一日遊 ⭐搭纜車+睇牛+小艇遊⭐

#離島好去處 早排同兩隻鴕鳥仔去咗大嶼山搭昂坪360，兼大澳一天遊。都已經諗咗好耐想去昂坪玩，終於度到有時間去，兼捕到平package👍🏻👍🏻。 昂坪360官網嘅「360探索大澳套票」做緊優惠，兼送埋「纜車探知館」門票一張，用埋in motion/ livi 等網購回贈信用卡，約等於七折就買到呢set套票，平過各大旅遊網站。 套票包括 ‌單程纜車 (東涌至昂坪) ‌大澳小艇遊 ‌一程昂坪至大澳，及一程大澳至東涌之新大嶼山巴士 ‌大澳小食券 (價值港幣20元) 價錢 標準車廂 成人 HK$ 188 小童(3至11歲) HK$ 103 水晶車廂 成人 HK$ 243 小童(3至11歲) HK$ 163 不過如果冇咗呢個promo嘅話，其實反而散買仲抵，成人標準纜車票$160，小艇遊$30，兩程巴士$27.2，小食劵$20，加埋先$247.2🌚🌚。纜車票去旅遊網站買可以仲更加平🤷🏻‍♀️。 我哋仲另外加咗每人$20玩埋「360動感影院」，官網獨有優惠，買纜車票可以加$20買埋各個昂坪市集嘅景點門票，可以同時買晒幾個景點。 講返當日行程，其實我哋算晏出發，因為住港島，去到東涌都要大約一個鐘。為咗節省時間，買咗幾個麥當勞外賣（事先用app落單可以再快啲），就直接去纜車站兌換門票上車。車程約25分鐘，沿途可以睇到東涌同大嶼山風光。 去到昂坪市集，行下睇下食下嘢影下相，再玩埋360動感影院同纜車探知館。兩個行程分別用咗10分鐘同20分鐘，留意番360動感影院要提前去counter預約觀影時段。昂坪市集真係好靚，啲建築古色古香，行到盡過埋牌坊仲可以睇到牛😍😍。啲牛牛好乖，任影唔嬲，仲可以摸下佢，一啲“牛脾氣”都冇😆。 而搭車去大澳之前，一定要用360換票券去換巴士證，先可以憑證上車。入到大澳，就可以根據banner嘅指示去到碼頭換票坐船。架船開到港珠澳大橋附近，睇日落真心靚。落船之後換個豆腐花，坐低唞下睇下海景😌😌。然後再行一陣，我哋嗰日入咗有自製康樂遊戲嘅鋪頭，類似冒險樂園嗰種，$88玩四個遊戲，贏唔到都可以換$60產品。雖然最後換嘅嘢實際價值可能只係$20😅，不過老闆真心好好心機帶小朋友玩，當支持下本地小店👍🏻。最後換埋個芒果糯米糍，再搭車返東涌，輕鬆一日親子遊完成！ 同場加映：持有迪士尼奇妙處處通嘅會員，可以憑卡喺東涌售票處，購買纜車門票或套票同時獲贈360動感影院門票。不過呢個優惠只限親身喺售票處購買，所以對一啲網上限定嘅套票優惠都無用。 #鴕鳥媽自肥日常 #親子一日遊 #昂坪360 #昂坪市集 #大澳 #大嶼山一日遊 #香港本地遊 #360動感影院 #纜車探知館