重房銅鑼灣午餐，食物精緻

今日約咗閨蜜去銅鑼灣食午餐，好掛住鄉下日本，諗一諗不如去食omakase，不過食廚師發辦係有啲難度，因為要搵到一間高質嘅係好難， 「重房」之前舊舖已經超高水準，佢哋而家搬咗新鋪，咁當然要去捧下場啦！ 食omakase講求嘅係食物、環境同埋氣氛～ 廚師精心挑選日本季節性食材，融合巧手而製作，新地鋪裝修帶點神秘感，枱面用咗凹凸紋雲石設計，神秘又時尚，坐喺吧枱望住廚師製作每一道菜餚，就好似一路睇住位藝術家一路製作藝術品一樣，視覺已經係一種享受，呢度嘅廚師亦都好健談同我哋好多互動，而且好清楚講解每道食材俾我哋知，氣氛令人好舒服～ 日式刺身料理廚師發辦午餐 12至13品 $598 北海道白粟米＆茶碗蒸 白粟米係季節性食材，係生食，爽口清甜。茶碗蒸，入口細緻軟滑～ 黃金武士真蠔 真蠔加咗少許紫蘇花點綴，黃金武士真蠔係日本兵庫縣，蠔味濃郁，而且有生蠔獨有嘅甜味，但又不失生蠔本身嘅海水味，口感爽滑 ，蠔嘅鮮味係口腔持久餘韻～ 平政魚 係九州嘅夏季季節食材，漁獲量比較低, 價格偏高. 味道比油甘魚更為清甜，油份不會過膩，而且鮮味，再加上自家製三文魚子，口感豐富～ 池魚卷 入面加咗蕪菁係圓形蘿蔔嘅漬物 ，好有創意，令到池魚魚香味更加突出，再加上京都五色芝麻碎點綴，畫龍點睛味道再昇華～ 中拖羅 配合咗九州烏魚子碎，中拖羅顏色已經好吸引，脂肪比例較高，入口魚香，而油脂非常甘香，食完之後口腔持久回甘～ 磯煮鮑魚 用咗慢煮嘅方式烹調，口感軟熟，加上用咗昆布煮，更加帶出鮑魚原有嘅鮮味，而醬汁甘香，盡顯廚師功架～ 銀鱈魚西京燒 西京漬醃魚之後直接燒，醬汁用白味噌做底，加上酒、味醂等……調味，混成西京漬，保留咗傳統特色，係一道經典嘅日本料理～ 甜蝦 甜蝦蝦肉晶瑩剔透，鮮甜爽口，蝦頭膏燒香咗，入口甘香，再配上紫香花，廚師話要一啖一次過食，果然口感層次分明～ 北海道帆立貝 係用咗新鮮嘅帆立貝，口感柔軟而有彈性 ，加上竹炭鹽、柚子皮碎，感覺好清新～ 煙燻深海池魚 深海池魚脂肪結實，肉質肥嫩，配合咗北海道麵豉醬，辣辣地，味道層次更上一層～ 燒鰈魚 魚燒得外脆內嫩，加咗日本京蔥 ，最後包上紫菜，香口脆身口感～ 北海道赤馬糞海膽 淡淡金黃色，口感幼滑，味道鮮甜，濃郁海膽味，而無澀味，加上沖繩淡雪鹽，可唔可以再嚟多份呢，哈！ 後文手造稻庭烏冬 係日本秋田縣嘅烏冬，麵條形態扁長，幼滑細膩，簡單配合昆布高湯，已經好好味～ 尾聲食埋甜品，黃豆粉綠茶蕨餅，喺呢一個午餐畫上一個完美嘅句號。 ～～～～～～～～～～～～～～～～～～～ 📍重房 (銅鑼灣) 銅鑼灣加路連山道1號地下18-19號舖 ～～～～～～～～～～～～～～～～～～～ 。 。 。 。 。 。 #銅鑼灣美食#銅鑼灣廚師發辦#omakase#香港美食#hongkong#香港探店#品牌合作#hkkol#報名7月酒店試睡員 #美食指南 #美食之旅 #hkfoodblogger #hkfoodie #hkblogger