玉桂山鴨脷排行山攻略

(不適合初階者） 路線：利東邨 (利東地鐵B出口) -> 玉桂山(196m) -> 連島沙洲 -> 鴨脷排燈塔 -> 連島沙洲 -> 女鬼手岩 -> 利南道 時間: 4小時 呢個路線主要分為四段 第一段係中等難度嘅山徑，沿途風景如詩如畫，有少少傾斜，不過有繩子輔助所以問題不大，路程唔算長，行大概半個鐘就可以登頂。山頂上景色怡人，似乎可以望到天際同海洋嘅交匯處。如果覺得攰好辛苦，建議攻頂後就原路折返 第二段嘅下山路斜度十足，浮沙碎石路同蚺蛇尖有得比，建議穿著防滑好啲嘅行山鞋。山徑上太陽暴曬冇瓦遮頭，所以最好擦防曬，不過可以睇到對面嘅海洋公園，好適合打卡 之後會經過連島沙洲去到第三段：鴨脷排燈塔來回路，建議體力足夠嘅先去。尼段路一開頭都要攀爬，不過後段算比較簡單。坦白講燈塔比想像中細，有啲失望。然而，當登上燈塔嘅高處，遠眺之下，一片蔚藍嘅海洋盡收眼底，令人心曠神怡。 回到連島沙洲就到第四段嘅海邊綑岸石路，途經女鬼手岩可以打卡。我地去果日因為前一晚落咗雨，所以石路嘅難度上升到極難，所以建議睇吓當日情況先行，可以選擇上返玉桂山走。沿路嘅石頭好濕滑，好多地方都冇繩子輔助（如果冇落雨應該唔會咁難），腳滑隨時就會跌入海裏，所以都需要好大嘅勇氣同毅力。我地當日只撞到一個專業行山友經過，佢話落過雨石好滑好危險，基本上冇人會行呢度，仲有聽講有人要叫飛行服務隊救緩。 *路線有好多草叢同好多蚊，記住一定要噴蚊怕水。即使著埋長褲都仲被蚊咬左整個腳... #報名6月酒店試睡員 #trip