泰國皇室的秘密花園：走進夢幻的邦芭茵夏宮

一向對宮殿建築情有獨鍾，所以今次嚟曼谷，特登預留咗一日去邦芭茵夏宮（Bang Pa-In Royal Palace），一個被譽為「泰式頤和園」嘅地方。佢距離曼谷大概七十公里，我係包車去嘅，車程一個鐘多啲，唔算遠，沿路都幾舒服。 地址：Tambon Ban Len, Amphoe Bang Pa-in, Ayutthaya, Thailand 成個宮殿面積好大，環境優雅得嚟又有種歷史沉澱嘅靜謐感。入場費只係100泰銖，折合大約HK$22，真係唔使諗就即刻買咗飛入去。 雖然而家大部分宮殿都唔開放入內參觀，但外觀已經好震撼。一入去就見到一座座來自唔同文化風格嘅建築，有泰式嘅金色亭台、中式嘅紅瓦屋簷，仲有歐洲哥德式風格、英式樓塔⋯⋯感覺好似一次過去咗幾個國家，行到邊影到邊，點都唔會悶。 我最鍾意嘅係中式嘅「天明殿」，紅牆金瓦，細緻得嚟又唔會浮誇，好有古典氣息。旁邊仲有個湖，湖面平靜得好似鏡咁，倒影住金色的亭子，影相真係靚到冇得輸。 喺度行可以揀坐觀光車，不過我自己就揀咗慢慢行，邊行邊影相、邊發呆，唔使趕，好寫意。不過要提提大家，服裝方面要注意，唔可以著短褲、短裙，連七分褲九分褲都唔得，我著咗條過膝裙就啱啱好，入場冇問題。 成個旅程我大概花咗兩個幾鐘，真係感受到泰國皇室曾經嘅優雅生活。無論係鍾意歷史、鍾意建築，定純粹想搵個靚地方chill吓，邦芭茵夏宮都好值得一遊。