每次去日本都住溫泉旅館,其實都可以試吓呢一間比較西式嘅酒店,呢間酒店分開本館同新館,本館係賣懷舊色彩,基本上傢俬同埋房間都比較殘舊,不過都算乾淨。新館方面,明顯地比起本館裝修比較現代化,亦都曾設咗好多唔同嘅擺設同裝飾品,房間亦都比較大但當然價錢都比較貴啦。
酒店本身係供應法國餐,晚餐係四道菜嘅法國餐,頭盤、湯、主菜同埋甜品,晚上用餐嘅時候侍應小姐亦都會幫你去影一張相,佢哋會喺你check out嗰日送俾你做紀念,都幾有特色。
酒店外邊其實過咗條馬路就係一個沙灘,夜晚你會見到好多人會揸架車喺沙灘泊車,跟住就喺嗰度camping同埋燒嘢食。感覺都Chill!
喺酒店前面仲有一部咖啡機,原來嗰部咖啡機係免費供應比住客去飲用㗎,雖然佢好似要入錢,但係其實你係入唔到錢架,直接撳掣就可以飲到咖啡㗎喇!